ပြိုကျသတ္တု မိုင်းတွင်းကို စစ်ဆေးရန် မြောက်ပိုင်းတိုင်း ညွှန်ကြား

ပြိုကျသတ္တု မိုင်းတွင်းကို စစ်ဆေးရန် မြောက်ပိုင်းတိုင်း ညွှန်ကြား   ၆ မေ ၂ဝ၁ဝ

တရုတ်နယ်စပ် မြန်မာနိုင်ငံ ကချင်ပြည်နယ် အန်ဒီအေ (ကေ) ထိန်းချုပ်နယ်မြေ ဖီမော် အရှေ့ပိုင်းတွင် ဖြစ်ပွားခဲ့သည့် မိုင်းတွင်းပြိုကျမှုကို သွားရောက်စစ်ဆေးရန် မြောက်ပိုင်းတိုင်းစစ်ဌာနချုပ်က ညွှန်ကြားကြောင်း သိရသည်။ အန်ဒီအေ (ကေ) ဒေသခံ ခေါင်းဆောင်တဦးက အဆိုပါမိုင်းတွင်း စပြီးပြိုကျစဉ်က ၎င်းတို့ ကမ်ပိုင်တီနှင့် ပန်ဝါတွင် နေထိုင်သူများပင် မသိကြကြောင်း၊ တရုတ်ပြည်ဘက်မှ သတင်းကို ကိုးကားပြီး ပြည်ပရေဒီယိုတို့ကလွှင့်မှသာ နည်းနည်းပါးပါး သိရကြောင်း ပြောသည်။ ၎င်းက “ခေါင်းဆောင်တွေဆီ ဖုန်းဆက်ကြည့်တယ်၊ ဘာများဖြစ်သလဲ ဆိုပြီး။ ထူးခြားတာ အားလုံး ဖုန်းပိတ်ထားကြတယ်။ လုပီမှာ တပ်စွဲထားတဲ့ နယ်ခြားစောင့်တပ်ကလည်း အဲဒီဘက်ကို စုံစမ်းဖို့ သွားကြည့်တယ်။ အဲ နယ်စပ်မှတ်တိုင်နားရောက်တော့ ဥက္ကဋ္ဌအမိန့်နဲ့ အဲဒီဘက် ဘယ်သူမှမသွားရဘူးဆိုပြီး ပိတ်ထားတော့ တပ်ကလည်း ပြန်လှည့်လာရတယ်။ ခုတော့ မြောက်ပိုင်းတိုင်း စစ်ဌာနချုပ်က စိတ်ဆိုးပြီး ချီဖွေဘက် ရောက်နေတဲ့ ဒုတိယဗိုလ်မှူးကြီး အဆင့်ရှိတဲ့ နယ်ခြားစောင့်တပ်ဆိုင်ရာ ဂျီဝမ်းကို လုပီတပ်ရင်းဆီ လွှတ်လိုက်တယ်။ ဒါနဲ့ ဂျီဝမ်းကနေ နယ်ခြားစောင့်တပ်က တပ်ရင်းမှူးနဲ့ အစိုးရတပ်က အရာရှိတွေပါ သွားဖို့ ညွှန်ကြားလို့ နယ်ခြားမှတ်တိုင်ဘက် ညကတည်းက ထွက်သွားကြပြီ။ ဒီနေ့ သွားစစ်ဆေးဖြစ်မယ်” ဟု ပြောသည်။ အဆိုပါ မိုင်းတွင်းပြိုကျသည့်နေရာသည် တရုတ်နယ်စပ်နှင့်နီးပြီး အန်ဒီအေ ဥက္ကဋ္ဌ ဆခုံတိန့်ယိန်း မိသားစုပိုင် မိုင်းတွင်းများအနက်မှ တခုဖြစ်ကာ အဆိုပါ မိုင်းတွင်းများသည် အန်ဒီအေ ခေါင်းဆောင်ပိုင်းပင် မသိဘဲ ဦးဆခုံတိန့်ယိန်းက တရုတ်ကုမ္ပဏီများကို တူးဖော်ခွင့်ပေးထားခြင်းဖြစ်သည်ဟု သိရသည်။ “အဲဒီဒေသမှာ မိုင်းတွင်း ဘယ်နှတွင်းရှိတယ်၊ မိုင်းတွင်းတွေကနေ ဘယ်လို သတ္တုတွေထွက်ပြီး တရုတ်တွေက တန်ချိန်ပေါင်း ဘယ်လောက် ထုတ်ယူသွားပြီးပြီလဲဆိုတာ ဘယ်သူမှ မသိကြဘူး” ဟု အန်ဒီအေ (ကေ) ဒေသခံခေါင်းဆောင်က ပြောသည်။ ယခုကိစ္စ တရုတ်သတင်းဌာနတို့တွင် သတင်းထွက်လာသည့်အခါ မြောက်ပိုင်းတိုင်းစစ်ဌာနချုပ်ကလည်း တိတိကျကျ မသိသည့်အတွက် နေပြည်တော်က ဂျီဝမ်းတယောက်ကို အမြန်စေလွှတ်ခိုင်းခြင်းဖြစ်ကြောင်း မြောက်ပိုင်းတိုင်း စစ်ဌာနချုပ်နှင့် နီးစပ်သူတဦးက ပြောသည်။ ၎င်းက “ဦးတိန့်ယိန်းက ရောင်းစားထားလို့ တရုတ်တွေက သူ့ဘာသာသူ လမ်းဖောက်ပြီး မိုင်းတွေ လာရောက်တူးဖော်နေတာ။ မိုင်းတွင်းပြိုကျပြီး လူ (၁၅) ယောက်လောက် သေတော့လည်း ဘယ်သူ့ကိုမှ ပေးမ၀င်ဘဲ သူ့အစီအစဉ်နဲ့သူ ကယ်ဆယ်ရေး လုပ်ငန်းတွေ ဝင်ရောက် လုပ်ကိုင်နေတာကို မြန်မာနိုင်ငံဘက်က အချုပ်အခြာအာဏာ ထိပါးခံရမှုအဖြစ် ပြောဆိုမှုတွေ ရှိနေတယ်” ဟု ရှင်းပြသည်။ မြစ်ကြီးနားမြို့မှ ကချင်ခေါင်းဆောင်တဦးကမူ စစ်အစိုးရကိုယ်တိုင်ပင် တရုတ်ကို ရေအားလျှပ်စစ်မှအစ ရောင်း၍ရသမျှကို အကုန်ရောင်းနေကြောင်း၊ အချို့ အပစ်ရပ်အဖွဲ့များကလည်း ကိုယ်ကျိုးအတွက် သစ်အပါအဝင် မြေပေါ်မြေအောက် သယံဇာတများကို လက်ညှိုးထိုး ရောင်းစားနေသည်မှာ ကြာပြီဖြစ်ကြောင်း၊ ယခုကိစ္စ ဖြစ်ပေါ်ပြီး မကြာခင် အခြားသတ္တုမိုင်း တူးဖော်ရေး လုပ်ငန်းကိစ္စတို့၌လည်း အန်ဒီအေ ဥက္ကဋ္ဌ ဆခုံတိန့်ယိန်းနှင့် စစ်အစိုးရ ပြဿနာတက်လာနိုင်ကြောင်း ပြောသည်။ ဆခုံတိန့်ယိန်းသည် ယခု ပြဿနာပေါ်သည့် မိုင်းတွင်းများနှင့် အခြား မိုင်းတွင်းပေါင်းများစွာ တရုတ်ကိုရောင်းပြီး ကိုယ်ကျိုးရှာနေကြောင်း၊ အာဏာသိမ်းပွဲ ဖြစ်ပွားပြီးနောက် အရေးနိမ့်ကာ လက်ရှိ မြစ်ကြီးနားမြို့တွင် နေထိုင်သည့် လယောက်ဇယ်လွန်းက မြောက်ပိုင်းတိုင်း စစ်ဌာနချုပ်ထံ စာရင်းဇယားများနှင့်တကွ တင်ပြခဲ့ဖူးကြောင်း သိရသည်။

ကုလသံက နိုင်ငံရေးအကျဉ်းသားများ လွှတ်ပေးရန် တိုက်တွန်း

ကုလသံက နိုင်ငံရေးအကျဉ်းသားများ လွှတ်ပေးရန် တိုက်တွန်း

မေလ ၀၆ ရက် ၂၀၁၀ ခုနှစ် ၁၆ နာရီ ၂၄ မိနစ်

အိုကလာဟိုးမားမြို့ (မဇ္ဈိမ)။      ။ မြန်မာနိုင်ငံ လူ့အခွင့်အရေးဆိုင်ရာ ကုလသမဂ္ဂ အထူးသံတမန်က စစ်အစိုးရအား နိုင်ငံရေးအကျဉ်းသားများ လွှတ်ပေးခြင်းဖြင့် အရပ်ဘက်အုပ်ချုပ်ရေးသို့ ချောမွေ့စွာ အသွင်ကူးပြောင်းရေး ကတိကဝတ်ကို ဖြည့်ဆည်းရန် ယခုလ ၄ ရက်နေ့က တိုက်တွန်းလိုက်သည်။

နိုင်ငံရေးပါတီများအား မှတ်ပုံတင်ခွင့်ပြုထားသော နောက်ဆုံးရက် နီးကပ်ချိန်တွင် မြန်မာနိုင်ငံ၏ လူ့အခွင့်အရေး အခြေအနေများနှင့် ပတ်သက်၍ လေ့လာသုံးသပ်ရန်အတွက် ၂ဝဝ၈ ခုနှစ် မေလကတည်းက ခန့်အပ်ခံရသူ ကုလ အထူးသံတမန် မစ္စတာ သောမတ်စ် အိုဂျေ ကွင်တားနားက တိုက်တွန်းလိုက်ခြင်း ဖြစ်သည်။

သူ၏ ကြေညာချက်ထဲတွင် “အရှိန်ရစပြုနေသည့် ရွေးကောက်ပွဲတွင် ပါဝင်ခွင့် ရရှိရေးအတွက် ယခုအချိန်သည် ဒေါ်အောင်ဆန်းစုကြည် အပါအဝင် ယုံကြည်ချက်ကြောင့် အကျဉ်းကျခံနေရသူ နိုင်ငံရေးအကျဉ်းသား အားလုံးကို အကျဉ်းချထားရာမှ လွှတ်ပေးခြင်းအားဖြင့် ၎င်းတို့၏ [စစ်အစိုးရ၏] ငြိမ်းချမ်းရေးလိုလားမှုနှင့် ပြည်သူလူထု၏ ဘဝအဆင့်အတန်းများ တိုးတက်ရေးကို အမှန်တကယ် လိုလားမှု ရှိကြောင်း သက်သေပြသင့်သော ကာလဖြစ်သည်” ဟု ရေးသားထားသည်။

“နိုင်ငံရေး အကျဉ်းသားများအား လွှတ်ပေးလိုက်လျှင် ၎င်းတို့အနေဖြင့် နိုင်ငံရေးပါတီများတွင် ပါဝင်ခွင့် ရရှိလာမည်ဖြစ်ပြီး၊ ရွေးကောက်ပွဲတွင် ပါဝင်ခြင်း မပြုရန် ဆုံးဖြတ်ထားသော နိုင်ငံရေးပါတီများအနေဖြင့် ရွေးကောက်ပွဲတွင် ပါဝင်ယှဉ်ပြိုင်ရန် စဉ်းစားလာကြလိမ့်မည်ဖြစ်ပြီး နိုင်ငံသားအားလုံး ရွေးကောက်ပွဲ ဖြစ်စဉ်တွင် တက်ကြစွာ ပါဝင်ဆင်နွှဲလာကြလိမ့်မည်” ဟု ထိုကြေညာချက်တွင် ဆိုထားသည်။

“၁၉၉ဝ ရွေးကောက်ပွဲအပြီး အနှစ် ၂ဝ အကြာတွင် ပထမဆုံး ကျင်းပမည့် ရွေးကောက်ပွဲသည် တရားမျှတကာ အများလက်ခံနိုင်သော အဆင့်အတန်းမီ ရွေးကောက်ပွဲဖြစ်ကြောင်း စစ်အစိုးရက အာမခံနိုင်ရန် အရေးကြီးသည်။ ထိုသို့ဖြစ်ရန်အတွက် စစ်အစိုးရအနေဖြင့် အားလုံး ပါဝင်ဆင်နွှဲနိုင်စေရန် လမ်းဖွင့်ပေးခြင်း၊ ပွင့်လင်းမြင်သာသော ရွေးကောက်ပွဲ ဖြစ်လာစေရန် ဖန်တီးပေးခြင်းနှင့် မြန်မာနိုင်ငံသားများမှ လွတ်လပ်စွာ စိတ်ကြိုက်ရွေးချယ်နိုင်သည့် အနေအထားမျိုးဖြစ်အောင် ကျင်းပပေးရန် လိုအပ်သည်” ဟု ကုလ အထူးသံတမန်က ဆက်လက် ရေးသားထားသည်။

စစ်အစိုးရသည် ရွေးကောက်ပွဲ ကျင်းပမည့်ရက်ကို မကြေညာရသေးသော်လည်း မတ်လ အစောပိုင်းက ရွေးကောက်ပွဲ ဥပဒေများကို ထုတ်ပြန်ကြေညာခဲ့သည်။ နေအိမ်တွင် အထိန်းသိမ်းခံနေရသော နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည် ခေါင်းဆောင်သည့် မြန်မာနိုင်ငံ၏ အဓိက အတိုက်အခံ နိုင်ငံရေးပါတီ NLD က ထိုရွေးကောက်ပွဲ ဥပဒေများသည် တရားမျှတမှု မရှိဟု ပြောကြားခဲ့သည်။

NLD က ရွေးကောက်ပွဲသည် စစ်အစိုးရ ဆက်လက်ကြီးစိုးရန် အကွက်ချထားပြီး ဒီမိုကရက်တစ် နည်းလမ်းများနှင့် ဆန့်ကျင်နေသဖြင့် ပါဝင်ခြင်း ယှဉ်ပြိုင်ခြင်း မပြုရန် ဆုံးဖြတ်ခဲ့သည်။ အချို့ တိုင်းရင်းသား နိုင်ငံရေးပါတီများ အပါအဝင် ပါတီအများအပြားမှာလည်း ရွေးကောက်ပွဲတွင် ပါဝင်ရန် ငြင်းဆန်ခဲ့ကြသည်။

၁၉၈၈ ခုနှစ်ကတည်းက အာဏာသိမ်းပိုက်ခဲ့သော စစ်အစိုးရသည် ဝန်ကြီးချုပ် ဗိုလ်ချုပ်ကြီးသိန်းစိန် အပါအဝင် စစ်ဗိုလ်ချုပ် အများအပြားအား စစ်ဘက်ရာထူးများမှ နုတ်ထွက်စေပြီး ရွေးကောက်ပွဲတွင် ပါဝင်ယှဉ်ပြိုင်ကြရန် စီစဉ်နေခြင်းဖြင့် အလုပ်များနေသည်။

“ရွေးကောက်ပွဲအကြို ပြင်ဆင်နေကြသည့် ကာလအတွင်း စစ်အစိုးရနှင့် အပစ်ရပ်အဖွဲ့များအကြား တင်းမာမှုများ ဖြစ်ပေါ်နေခြင်းကလည်း ရွေးကောက်ပွဲကို ထိခိုက်စေသည်” ဟု မစ္စတာ ကွင်က ကြေညာချက်တွင် ရေးသားထားသည်။

၎င်းက အမျိုးသားပြန်လည် ရင်ကြားစေ့ရေး လုပ်ငန်းစဉ်တွင် အားလုံးပါဝင်နိုင်မည့် အနေအထားမျိုး ဖန်တီးပေးသင့်ကြောင်း စစ်အစိုးရကို ထပ်မံပြောဆိုခဲ့သည်။

မစ္စတာ ကွင်တားနားက ယခုအချိန်သည် စစ်အစိုးရအနေဖြင့် မြန်မာပြည်သူများ၏ လူ့အခွင့်အရေး အခြေအနေ ပိုမိုတိုးတက်လာစေမည့် အမျိုးသား ပြန်လည်သင့်မြတ်ရေးနှင့် ငြိမ်းချမ်းစွာ အသွင်ကူးပြောင်းရေး ကတိကဝတ်များကို အမှန်တကယ် လိုလားကြောင်း ပြသရန် အချိန်မနှောင်းသေးဟု ယုံကြည်မိကြောင်း သူ၏ ကြေညာချက်တွင် ဆိုထားသည်။