Popular Posts

Monday, March 8, 2010

Zolai theih huai pawlkhat - II

Zolai theih huai pawlkhat - II Print E-mail
By Thelnah    Tuesday, 13 October 2009
Zolai tawh kisai thulu mah tawh lai hong at kik ingh. Zomi khangthakte lak ah tuhun ciang in Ih Zo’ paunakte uh leh Lakam / lapaute athei nawnlo leh atheih tei hang’ azang siam lo tampi om hi. Paunakte theina pi akhiatna theilo, tua ban ah Lakamte theina pi, a gennop theihloh man bek a zang siamlo cih bang omthei hi. Tua ahih man in ah theih huai kasak pawl khat hong tak lang nuam ingh.
Zomite’ Paunakte leh a khiatna
 A si masa puantuam tang.
= A masa peuh hampha zaw.
 Akta mangkuan kitutu.
= Kilemna om kei leh, kiamsukna, man’thatna piang. / A mangthang nuam a kilemlo.
 Akta duhgawl kilawhkhuh.
= Huaiham lua leng gimna kingah thei.
 Aktui sungah a vom ding leh a kang ding kithei lo.
= Mailam thu piang ding kigen khol thei lo.
 Bui a phakkuan a tawp.
= Maban tun dektak napi, a tutkuan a tawp.
 Ciimnuai a sa kibah, Geltui ah kithuk.
            = Lungdamna mangngilh ngei lo, khat vei teitei thukkik hamtang.
 Dek lam tuktum zong gal suak.
= Ih muan pen zong gal suak thei.
 Gallu kihta gallu tuak.
= A haksa khat peuh ut lo a, ih pelh hangin tuak veve.
 Galphawnkuan leh matutkim.
= Nasepna khat peuhpeuh ah, ih zawhkuan ciangin, hanciam semsem ding.
 Gip zong leh khuai zong kituak.
= Deih tuak kikhek.
 Hakai pahtak lung heng.
= A hoih dinga ih upmawh khat, a hoih lote.
 Hausa sialmei let.
= Nasepna-ah a kimangsakte.
 Hawmsiam nungta, nebum puksi (si baih).
= A kicing in hawm dimdiam leng, nuntak nuam. Huaihamin angsung bek gen leng, puksi thei.
 Inngua hah lo gamgua hah.
= A u leh nau, khua leh tui puah lo a, midang a puahte.
 Kamsiam siallei sang, kamsia sial liau.
= Kamsiam leng thusia zong mai thei, kamsia zang leng thu gina lokhat ah zong kiliau thei.
 Khaikha a gui-ah gah.
= Mi hoih lote kigui zuih.
 Kawl zong tuidamin kiho.
= Zin do lengla do siam.
 Kom Kim zong tapasal sagih neisa nawkik.
= Numeite tanu tapa a kimin a neih hangin, kisaktheih ngam huai lo.
 Khuapiguah zu satang hal.
=Thu khat peuh a than’ vengvang hang, a dai baihte.
 Lam nai tawn nuam behiang kum kua-a tung lo.
= A ngeina bang tawn loin, a baihbawl manin haksatna a piang thei thute.
 Langbawm/Mangbawm a ek ah awk.
= Ih kidop kei leh eima gamtatna pan gimna kingah kik thei.
 Leii leh ha zong kipet.
=Ih it ih ngaih pente tawh zong kitawng kha thei.
 Lusum zong bingtawng a zom.
=Thu siasa a hoih dinga lempha.
 Meimalo ah tho tu lo.
= A omsa thu khat om loin kigen lo.
 Meigong lung leh sazan ta.
= Thu khual lo, hehbaih, lungtom, ngongtat
 Mihing leh papo.
=Mihing nuntak huntom.
 Mualmong meikhu zong nuamtuam.
= Dahna lungkhamna, haksatna i tuah laitakin i gei-a mi ommawk khat zong nuamtuam sa-in kingai hi.
 Mui zang lua kipei sat.
= A kipilsak lua te’n tuakkhial baih.
 Nadak kangin Kawl lawh, Daizang kangin Sulgua peh.
=Mun khat a thu piang khat in mun khempeuh lawh thei.
 Ngaltang hapaksa tumkik ngei lo.
= Pasal thu gensa dokkik ngei lo.
 A nunung galban sat.
= A lawmte zahin a hat loh hangin lungkia loin sem teitei ahih man in hamphatna ngah veve.
 Nu leh pa thumang a nah lawh pek.
=Nu leh pa thumangte in thupha ngah in kampha.
 Nupa kilungtuak khua khat in zo lo, khua khat kilungtuak khua kua in zo lo.
= Ki lungtuak a ih kithubup leh kua mahin hong susia zo lo.
 Numei-in ama nawt, sumkuang in a lii khuat.
= Eima mailam nuntak nading, eimah ciatin ih hanciam kul.
 Nahkia kawi-in nahkia mam suang.
= Mi gina lo sung pan mi gina khat peuh piang thei.
 Pute leh lamsak kineh zo lo.
= Ih pute ih simmawh nop hangin kizo ngei lo.
 Sakhi a pi san a no san.
= Ih nu ih pa mah kisun ciat.
 Sakhi that lo, ngal tang tum.
= A neu nate zo masa loin na lianpi a tumte.
 Sial tat nunga sialdai kai.
= A sia ding teng a siat khitteh, ih puahkik hang phatuam nawn lo.
 Sial nuphal zong sihkuangah kiliak.
= Ih lawm ih gual luite kimangngilh ngei lo ahih manin ih kimuh kik ciangin nuam kisa.
 Sial vom leh sial vom kiingai.
= Eimah tawh a kibang mite kingai.
 Simbeng zong kim citciat tangzang kiguang.
= Pilna siamna kikim ta leh makai ding khat kiguang tuam.
 Suangpi suangneu in thek.
= Amah kia a, a lian a hau thei om lo.
 Tang a si kawlin kah.
= A beisa huna, nopna dahna a hong phawk kiksak na. (mehmuh).
 Tu nai lo khe khuang, man nai lo tul sui.
= A hih ding teng, zo masa phot lopi a, a man khinsa bang a omte.
 Thupha in kongbiang kan lo, thusia in mual kua khum.
= Thuhoih thupha kizel hak, thusia kizel baih.
 Va-ak cingkam sakhau taw-ah kikuah lo.
= A tawntunga kikem, kigalging gigete tungah thusia lung ngei lo hi.’
 Vai nunung guahsia in lap.
= Sepna bawlna-ah a thadah a, a tuantualte haksatna khat peuh in lap.
 Vaphual tangsa, va-ak tang.
= A ginasa mi khat ama kikep zawh loh mana, a gina lo a suak kikte.
 Zawlthu kalah sial thawl.
= Zawlthu ah thu neuno khat peuh thu lian suak baih deuh.
 Zawng nek ngau in thuak.
= Mi khat gamtat hoih lohna mi dang khat in thuak lawh.
 Zawng in a ma kheng mu lo-in, a lawmte kheng ko.
= Ama hoih lohna kimu lo-in a lawmte hoih lohna bekbek a ko-ko te.
 Zuau in a khap lawn.
= Zuau thu ih gen leh kisul zuihin kithei kik veve.

Zomite lakam / lapau leh a khiatnate
 Anglai - Ang
Angkawi, Kawinem - Zi (Pasalte in a zite a cihna)
Besam - Sam
Banzal - Khut
Buh-al / Baw-al - Ak
Beng - Bil
Ciin - U
Ciin leh tuai – U leh Nau
Cialdawh - Dolcial
Ciandal - Dak
Ciau - Gun
Damtui – Tui siang, tui luang
Duang - Pumpi
Duangkuai - Ngai a gim
Honem - Ngaihno
Haibang ngak – Ngak ngit-nget, lungkia lo a ngak
Kiang - Pasal (zite in a pasalte a cihna)
Kankil - sangkil
Kankong - Kong
Kawlciang - Thau
Kulsin - Hankhuk, khul
Khuam bang kho - Kho, kip
Lakmai - Maitang
Luankhi - Khitui
Laizom - Sanggam
Lia - Numei, nungak
Lunmang – Hausa
Laikhun – Lupna
Lumsuang – Suang
Lel – Gen
Leng – khawl, hawh, om
Liangvai – Genthei
Lingpak – Pak lingnei (Rose)
Lawkta – Tawlawk
Maimit – Mit
Maimit suan – En
Maimit sing – Ihmu
Momno – Khangno
Nunkhum – Nawi
Namza – Zatep
Nen ah – Kiangah
Niang lun, nibang sa, - Thupi nibang tang
Omlai – Natna
Pheiphung – Khe
Puvon – Pu
Pisei – Pi
Pahtang – Innka
Pheiphung suan – Lampai
Pham, Khakia – Si
Phialva – Vasa
Phualva, phualngo – Vaphual
Phuh bang kho – Kip, Ling lo.
Sawn – Tu (Ta’ ta)
Sianmang – Pasian
Saumang – Inn
Saulim – Inn
Sumtual – Inntual
Se-al – Aksi
Sesum – Sum, dangka
Sunglawh – An
Sen vangngaih – Neu tunga vangngaih
Seinogual – Khangual
Sang – Sa peuhmah
Sawmsial – Sial
Sakamkei – Sahang
Simzawng – Zawng
Tuun – Nu
Tuai – Nau
Tang –Pasal, tangval
Tuanglam – Lampi
Thelnah – Laikhak
Tongdam – Kampau
Tangbang dam – Cidam
Tumbang guai – Teek
Von – Ta
Vaimang – Gam Kumpi
Vui (Hui) – Sai
Zua – Pa
Zinleng – Dawi
Zamluang – Zam
Zaila – La
Zaila sut – La sut, la gen, lasa
 
Posted by at

No comments:

Post a Comment

Subscribe to: Post Comments (Atom)